مصطفى دحلب (Mustapha Dahleb)

"راني فرحان" يا فخامة الشّعب !.

والله ما كليت الكاشير..

صحيتوا، يا الشّعب الجزايري، واش راكم شوية؟.

اليوم رايح ندوّن بالدّارجة، باش يفهموني بزاف من النّاس.

اسمحولي، نرجع بيكم شوية للور.. تشفاو في 4 ماي 2017، كانت عندنا انتخابات تشريعية، وكان شعارها "سمّع صوتك" (ضربنا عامين وباش فهمنا الميساج، وخرجنا قاااااع). ويلا تشفاو، كان واحد اليوتوبير دار البوز(Buzz) على اليوتوب، ما كان لاه نذكر اسمه، كان عنوان الفيديو اللي حطو على اليوتوب "ما نسوطيش في البوطي يا الغوطي"، وكاين واحد صاحبوا ثاني دار فيديو في 2017 " راني زعفان كي ما كليتش البانان". ركزوا معايا شوية، شوية، درك نفهموا الحكاية مع بعض.

في ذاك الوقت، الناس كامل حاروا كيفاه، يوتوبر بسيط يدير فيديو بتقنيات عالية، حيرت حتى أويحيى، وبدوي، وناس أخرين في السّلطة، وقالونا أيادي أجنبية راهي تفسد في العرس الانتخابي.

معليش، أنا قلت نلعبها "بغل"، ونروح ندير بحث في غوغل، ونشوف بالاك نقدر نعرف كاش حاجة على الأيادي الأجنبية.  

أوّل معلومة لقيتها، أنّه كاين مجمع أصله فرنسي للاستشارة والاتصال اسمه "أليصابة"، ويا بابا، يا بابا، زوج شبان صغار، طاحوا في قمح مسبل، حطّوه أغمار، مقرّبين من علي "بن عسلوجة" اللّي يحب الشّخشوخة، واللي نظم منتدى كبير، عرض فيه السّلطات، وأولاد ماما أفريكا، وبهدل بيهم، ومن بعد هرب لإسبانيا، هو وصحابوا زوج (الشبان الصغار اللي طاحوا في قمح مسبل، شفيتوا عليهم، وإلاّ نعاود نحكيلكم عليهم؟)، هربوا من الضّغط على خاطر داروها كبيرة، ما شي كبيرة بزاف، بزاف، بصح طيحة في خاطر عمّي البهاليل نتاع الفقاقير، هاذاك اللي قال لمادام سامية زيدي الـ Musica.

كان هذا نهاية 2016، الزوج اللي هدرت عليهم، كانوا متنورين بزاف، وحابين يوريو للشباب الجزايري كيفاه يولي أوم دافار في وقت قياسي، كيما هوما، بصح باش تنجح كيفهم لا زم يتوفر فيك شرط أساسي، لازم تكون مدعوم من طرف علي "بن عسلوجة" اللّي يحب الشخشوخة أون بارغسون.

من بعد، حوّست مليح لقيت بلي جماعة "أليصابة يا بابا" نظموا من قبل ندوة اسمها "عفسة"، كان هذا سنة 2014، الندوة هاذي حضرها أكثر من 1200 مشارك، كاين فيهم اللي كلا الكاشير، وكاين اللي شرب القازوز اللي فيه حاجة دوّخ، وكاين اللي حضر الحفلة الصغيرة نتاع الشاب خالد، وراح روح بلا ما بقّاوه بالسّلامة، وكاين اللي دار حوايج أخرين ما نقدروش نهدروا عليهم، على خاطر رانا متخلطين، وإلا واش قلتوا؟.

ما يهمناش، الشيء اللي عرفتوا، أنّه الزوج اللّي شراو "أليصابة" واحد فيهم قريب بزاف لحبيبنا لاسويس، والثاني باباه مستشار مول السطح، يعني كانت باينة تكمل كيما هاك.

واش عرفت ثاني، أنّه "أليصابة" كانت متعاقدة مع "الريزو نتاع زيزي"، وخاوتنا اللي هدرنا عليهم نتاوع "ما نسوطيش في البوطي يا الغوطي"، و"راني زعفان كي ما كليتش البانان" كانوا خدّامين حزام مع "الريزو نتاع زيزي" ومشتاركين مع "أليصابة"، والحاجة المهمة في الحكاية هذي أنّه باش تسنيي العقد مع "أليصابة" لازم ادير التحية والقسم لمامون لا فغونس...

شكون هوما الأيادي الخارجية، درك، يا الطحاحنة؟.

شبعتونا كاشير، والله ما تحشموا.

ويحيا عمّي الصّالح، اللّي معاه نقضيوا الصوالح!.

الفاهم يفهم اللّي مفهمش، والهدرة المرّة الجاية على المكشوف.

ما نيش حاب نكثر عليكم، إذا عجبكم هذا الموضوع، ديروا جام، ونتلاقاو في لاسويت، إن شاء الله.

#ترحلوا_يعني_ترحلوا

#يتنحاو_قاع